മാനസികാരോഗ്യ ബോധവത്കരണവും വ്യക്തിത്വ വികസന പ്രവർത്തനങ്ങളും മുൻനിർത്തി ശ്രദ്ധേയ സേവനങ്ങൾ നടത്തി വരുന്ന കദീജയ്ക്ക് ബി.എസ്.എസ് ദേശീയ പുരസ്കാരം ലഭിച്ചു. മെയ് 12-ന് തിരുവനന്തപുരത്തെ ബി.എസ്.എസ് ആസ്ഥാന മന്ദിരത്തിൽ നടന്ന പുരസ്കാര വിതരണ ചടങ്ങിൽ ദേശീയ ചെയർമാൻ ഡോ. ബി. എസ്. ബാലചന്ദ്രൻ പുരസ്കാരം സമ്മാനിച്ചു.
നവാസിൻ അക്കാദമിയിലെ മെന്ററായും സൈക്കോളജിക്കൽ കൗൺസിലറായും പ്രവർത്തിക്കുന്ന കദീജ, വ്യക്തികളുടെ മാനസിക വളർച്ചക്കും ജീവിത നിലവാരം മെച്ചപ്പെടുത്തലിനുമായി നിരവധി പ്രവർത്തനങ്ങൾ നടത്തി വരുന്നു. മൈൻഡ് റീ-ഡിസൈനിംഗ് ലാബ് അക്കാദമിയുടെ സ്ഥാപകരിൽ ഒരാളായ അവർ, മാനസിക ശക്തീകരണവും വ്യക്തിത്വ വികസനവും ലക്ഷ്യമാക്കി വിവിധ പരിശീലനങ്ങളും കൗൺസിലിംഗ് പരിപാടികളും സംഘടിപ്പിച്ച് ശ്രദ്ധ നേടിയിട്ടുണ്ട്.
വിവിധ അക്കാദമികളിൽ സൗജന്യമായി സൈക്കോളജി ക്ലാസുകൾ നടത്തി അറിവ് സമൂഹത്തിലെ വിവിധ വിഭാഗങ്ങളിലേക്കെത്തിക്കുന്നതിലും കദീജ സജീവമാണ്. സാമ്പത്തിക പരിമിതികൾ കാരണം പഠനാവസരങ്ങൾ നഷ്ടപ്പെടുന്നവർക്കും മനശ്ശാസ്ത്ര വിജ്ഞാനം ലഭ്യമാക്കാൻ നടത്തുന്ന ശ്രമങ്ങൾ സാമൂഹിക പ്രതിബദ്ധതയുടെ മികച്ച മാതൃകയായാണ് വിലയിരുത്തപ്പെടുന്നത്.
കൗൺസിലിംഗ് രംഗത്ത് നിരവധി വ്യക്തികൾക്ക് മാനസിക പിന്തുണയും മാർഗനിർദ്ദേശവും നൽകി വരുന്ന കദീജ, സഹാനുഭൂതിപൂർവ്വമായ സമീപനവും ശാസ്ത്രീയമായ നിർദേശങ്ങളും കൊണ്ട് ശ്രദ്ധേയയാണ്. മാനസികാരോഗ്യ ബോധവത്കരണ രംഗത്തെ സമഗ്ര സംഭാവനകൾ പരിഗണിച്ചാണ് അവരെ ബി.എസ്.എസ് ദേശീയ പുരസ്കാരത്തിന് തെരഞ്ഞെടുത്തത്.
